Otsailaren 14an, Ostots kooperatibako kideak Odietako Erripan izan ginen, bertako udaletxean, energia gaiekin arduratutako herritar talde batek antolatutako hitzaldi ziklo bateko bigarren saioan parte hartzeko.
Aurrez, argindar faktura ulertzeko hitzaldi bat jaso zuten, eta bigarren saio hau, Erronkariko energia komunitatearekin batera, Nafarroako energia komunitateen esperientzia ezberdinak ezagutzeko antolatu zuten. Modu honetan, KEB Nafarroa bulegoen laguntzaz, Odietan energia komunitate bat martxan jartzeko herritarren gogoa neurtu nahi izan dute.
Odieta, azalera, biztanle kopuru eta dentsitate aldetik, Araitzen antzeko udalerria da; kontzejuz osatua eta landa-eremukoa. Hori dela eta, Ostots kooperatibaren esperientzia ezagutu nahi izan zuten. Guk bizitako prozesuaren nondik norakoak, gorabeherak, lorpenak eta akatsak partekatu genituen ordu t’erdiko elkarrizketa batean.
Bertaratutako herritarrek interesa azaldu zuten guk kontatutako prozesuan, aurrera atera nahi ditugun instalazio fotovoltaiko partekatuei buruz edo egindako bidean lortu ditugun ezagutzen inguruan. Entzundakoarekin jakin-mina piztuta, hurrengo bilera baterako eguna ezarri dute, herrirako energia komunitate bat sortzeko urrats berriak emateko.
Ea Odietan ere aurki ostotsak jotzen duen!
